Comare s’hat postu in coa

Testo: Gavino Contini – Musica: Bernardo Deriu

Solista: Domenico Murrighile

 

Comare s’hat postu in coa su pizzinnu  a lu ninnare,

pro cussu l’hap a bantare segundu su ch’app’ischidu,

chie hat intesu hat bidu chi non hat nudda assimizzu

de mama ch’ammutat fizu e ne de cojuada noa.

 

No naro ch’est cojuada sa chi ninnat su piseddu

no hat d’affidu s’aneddu c’ancora est senz’affidada

e mancu est affizzada prite giovanedda in fiore

ispinta dae s’amore cominzat a l’ammutare.

 

Comare s’hat postu in coa su pizzinnu a lu ninnare.

 

Lu ninn’eo su banzigu drommi caru tesoro

ti fatt’eo cun su coro pro reposare zanzigu

de latte durche e non ranzigu ti zibo si famine hasa

in brazzos mios ti pasa si mi cheres cuntentare.

 

Prite non t’has a drommire gioia a su ninniddu meu

ti do onzi recreu pro no ti fagher suffrire

faghemillu nessi ischire su motivu chi no pasas

ca no carignas ne basas cantu mi faghes penare.

 

Reposadi anima mia ca in su coro ti tenzo

in benujos ti mantenzo nende “a ninni a ninnia

tottu dare ti cheria cantu deus m’hat donadu

bastet de t’ider caladu diat sa vida impignare.

 

Malu no paret su donu su jogulu andat ballende

sos versos chi ti so nende figuran senza su sonu

duncas drommi fizu onu prima chi ninniende ismarre

su chi cherzo ancora narre fastizzu ti podet dare.

 

S’ammutare happo finidu pro oje die de festa

confusa tenzo sa testa e senza t’ider drommidu

su ch’in coro est fioridu possedas finas a sa morte

ma timo no hapas sorte chi tantu potas lograre.

 

Comare s’hat postu in coa su pizzinnu a lu ninnare.